गँगस्टर्सची दुनियादारी ...

गुन्हेगार आणि राजकारणी मंडळी, लग्न आणि मयत या घटनांचा वापर खुबीने वापर करतात. आमच्याकडे तर काही महाभाग राजकारणी, गुंड असे आहेत की, वर्षाचे 365 दिवस लग्न, बारसे वाढदिवस, मुंजी, एकसष्टी, पासष्टी, पंच्याहत्तरी की अमृतमहोत्सव की आणखी काही तसेच सहस्त्रचंद्र दर्शन, लग्नाचा वाढदिवस, मासिक, पुण्यतिथी, मयत असलं काहीही असो, तिथे ते हजेरी लावून निवडून येतात. लोकही खुश असतात, आपला माणूस किती मोठा आहे तरीही सुखदुःखात भेटायला येतो, आणखी काय पाहिजे असा त्यांचा उलट सवाल असतो.

हे गुंड, राजकारणी (द्विरुक्ती होतेय!), परस्परांना बंद झालेली दारे उघडून जुनी दुष्मनी मिटवण्यासाठीही अशा कार्यक्रमात जातात अन् कालांतराने सांगतात की, आमच्यातली बेदिली आता संपुष्टात आलीय.

आपसातले ट्युनिंग जुळवण्यासाठी फक्त राजकारणीच याचा वापर करतात असे नसून नामचीन गँगस्टरही या संधीची चातकासारखी वाट बघत असतात.

या सुखदुःखाच्या क्षणात एकमेकाला भेटून ते आपले बस्तान घट्ट करतात. असाच एक किस्सा आठवतो.
वास्तवात ही पोस्ट दशकापूर्वीची आहे मात्र परिस्थितीत बदल होण्याऐवजी अधिक बिघडलीय.

कुख्यात गुंड राजन निकाळजे ऊर्फ छोटा राजन याची आई लक्ष्मीबाई हिचे निधन झाले होते. अंत्ययात्रेची वेळ डिक्लेअर झाली. अंडरवर्ल्डची भाई मंडळी एकएक करून तिथे पायधूळ झाडू लागली.

निधनाचे निमित्त करुन कथितरित्या सांत्वन करण्यासाठी एकेकाळचा खुंखार गुंड आणि मध्यंतरी सर्व गुन्ह्य़ांतून निर्दोष सुटलेला अश्विन नाईकही याला अपवाद नव्हता. छोटा राजनची आई निवर्तलीय हे कळताच त्याच्या डोक्यात खिचडी शिजू लागली.

त्यानं मनाशी खूणगाठ बांधली आणि तो थेट छोटा राजनच्या चेंबूरच्या बालेकिल्ल्यात गेला. वास्तवात तिथे जाणे मृत्यूच्या जबड्यात हात घालण्यासारखे होते.

दरम्यान अंत्ययात्रेला येणाऱ्या व्यक्तींवर पाळत ठेवणाऱ्या पोलिसांच्या नजरेनेच सांत्वनासाठी खास करून आलेल्या अश्विनला हेरले आणि एकेकाळी या दोन टोळ्यांमधील टोकाच्या संघर्षांची चर्चा होऊ लागली.

लक्ष्मीबाई निकाळजे हिची अंत्ययात्रा छेडानगर येथून निघाली. या अंत्ययात्रेत काही फरारी गुंड असतील, अशी शक्यता असल्याने गुन्हे अन्वेषण विभागातील काही अधिकारी साध्या वेशात पाळत ठेवून होते.

याच काळात अश्विन नाईक सांत्वन करण्यासाठी आला. त्याने छोटा राजनची पत्नी सुजाता ऊर्फ नानी, तसेच भाऊ दीपक याचीही भेट घेतली. एकेकाळी दाऊद टोळीत असलेल्या छोटा राजनच्या विरोधात अमर नाईक आणि पर्यायाने अश्विन नाईक टोळीमध्ये जोरदार धुमश्चक्री होत होती.

आईच्या निधनानिमित्ताने सांत्वनासाठी आलेल्या अश्विनमुळे आता त्यांच्यामध्ये तडजोड झाली असावी, अशी चर्चाही पोलीस वर्तुळात सुरु झाली.

अमर नाईक सक्रिय असताना त्याचे अनेक म्होरके दाऊदसाठी काम करणाऱ्या छोटा राजनने टिपले होते. त्यामध्ये प्रामुख्याने रम्या भोगले तसेच शिक्का नगर येथील दशरथ रहाणे या अमरच्या अत्यंत विश्वासू साथीदारांचा समावेश होता. दशरथ रहाणेची लालबाग येथे अंगावर शहारा येईल अशा पद्धतीने निर्घृण हत्या करण्यात आली होती.

मात्र या दुःखाच्या क्षणी अश्विन नाईक हा छोटा राजनच्या घरी येऊन गेला आणि त्यांच्या दुष्मनीतली धग कमी होऊन गेली. यानंतर अश्विनने लाईन बदलून हात मारता येतो का हेही पाहिले.

स्वतःला बदलवण्याचा प्रयत्न करणाऱ्या अश्विनने लाईन अजून क्लिअर नाही हे ध्यानात येताच छोटा राजनचा आदर्श घेत 'आत राहणे' पसंद केले आणि तो आता सुखरूप व समाधानी आहे.

तो 'आत' किती समाधानी आहे याचे उदाहरण म्हणजे कट्टर दुश्मन असलेल्या दाऊदच्या टोळीतील मुस्तफा डोसा बरोबर आर्थर रोड कारागृहात झालेल्या म्युझिक थेरपीच्या कार्यक्रमात 'शांताबाई'च्या गाण्यावर ठेका धरला होता! आता मुस्तफा डोसा हयात नाही.

दाऊदसुद्धा सुखशांती शोधत आर्थर रोड कारागृहात आला तर नवल वाटणार नाही, कारण या लोकांना इथे बाहेरपेक्षा जास्त सेफ्टी 'भेटते' ! यांच्या दुनियादारीतली ही खासियत आहे. आत जाऊन कामे करतात आणि काहींना काम दाखवतात !

राजकारणी आणि गँगस्टर दोघेही आपल्या दुनियादारीचे स्वरूप लगेच पालटतात अन अशा संधीचे सोने करतात. सामान्य माणूस मात्र आपसात भांडणे झाल्यावर चडफडत समोरच्याला म्हणतो की, "तू मेलास तरी तुझे तोंड बघणार नाही !" ....अन तो खरंच असंच वागून दाखवतो.

इव्हन इथं फेसबुकवर देखील अनेक जण असं भांडतात की, कुणी मातोश्रीवर तर कुणी रेशीमबागेत तर कुणी बारामतीत तर कुणी आणखी कुठल्या ठिय्यावर जन्माला आले असावेत!
आयुष्यात कधीही तोंड एकमेकाचं तोंड न पाहिलेली माणसं सोशल मीडियामुळे हाडवैरी बनतात!
असं वागणाऱ्या लोकांची संख्या मोठी आहे. त्यांना दुनियादारी अन् सामान्य जणांची लाईफ कळलेली नसते!
या उलट राजकारणी अन् गँगस्टर्सकडे बघा , 'जीवन त्यांना कळले हो !" .....

'राजकारणी आणि गँगस्टर हे दोघे एका माळेचे मणी असतात' असा अन्वयार्थ कुणी काढत असेल तर तो अनुचित नाही! हे दोघेही गरज पडली की परस्परांना बरोबर भेटतात, आपला कार्यभाग साधतात. त्याउलट कॉमन पब्लिक राजकारणाच्या इतकं आहारी गेलं आहे की, त्यापुढे त्यांनी सारे संबंध झुगरले आहेत, नात्यांची मोडतोड केलीय! आणि इतकं करून कोणते सत्य समोर येते?
तर कोणताही राजकारणी कुणाचाही कायमस्वरूपी दुष्मन नसतो, अशी मल्लिनाथी करतात.

लोकांची माथी भडकावणाऱ्या आणि आपसात झुजवत ठेवणाऱ्या राजकारण्याची मुलं उच्च शिक्षणासाठी देशात पाठवतात, हाइट म्हणजे अलीकडील काळात गुन्हेगारीत रुतलेले लोकदेखील आपल्या मुलाबाळांना शिक्षण घेण्यासाठी दूर पाठवतात. छोटा राजनच्या एका मुलीने इंजिनिअरिंग केलेय, एकीने एमटेक केलेय तर तिसऱ्या मुलीने चक्क ब्रिटनमध्ये एमबीएचे शिक्षण घेतले!

एकीकडे अशी स्थिती तर दुसरीकडे राजकारणी लोकांनी शेपूट पिरगळल्यागत आताच्या पिढीतील तरुण पोरं मात्र शिक्षण, नोकरी, कामधंदा सोडून गल्लोगल्ली पुढाऱ्याच्या मागे बोंबलत फिरतात; आयुष्यभर द्वेषाचे जळू जोपासतात!

इथे सोशल मीडियावर तर अशी हाडहूड करणारी जमात मोठ्या प्रमाणात आढळते, हे हाडवैरी असल्यागत वागतात आणि यांचे शीर्ष नेते एकमेकांच्या पाठी खाजवतात, कधी छुपे तर कधी उघड कौतुक करतात, गुप्त संधान बांधून ते सारेच पुढे जातात आणि इथे हे डोकी फोडत बसतात!

सामान्य माणसाला पूर्वी थोडीतरी दुनियादारी ठाऊक होती, काळ असा काही बदलत गेला की आता सामान्य माणूस कशाचा निषेध करत नाही की कसल्या गोष्टींवर प्रेमही करत नाही!


तो दुनियादारी विसरलाय आणि त्याच्या दुनियेतून प्रेम, आस्था, माया, करुणा आणि स्नेह या भावना लोप पावून द्वेष, मत्सर, क्रोध लोभ यांनी घेतलीय! आपली ही काय अवस्था झालीय!

- समीर गायकवाड

अश्विनच्या काही नोंदी - अश्विन नाईक हा मुंबई अंडरवर्ल्डमधला सगळ्यात जास्त शिक्षण घेतलेला डॉन. त्याने सिव्हिल इंजिनीयरची पदवी घेतलीय. उच्चशिक्षित आणि अस्खलित इंग्रजी बोलणारा, कोणत्याही हत्येचं प्लॅनिंग काटेकोरपण प्लॅनिंग करणाचा डॉन म्हणून अश्विन नाईकची ओळख तयार झाली.
अश्विनचा भाऊ अमर नाईक याची एक मुलगी डॉक्टर आहे तर दुसरी मुलगी युएसमध्ये फ्लाइट अॅकॅडमी चालवते. अश्विनची मुलगीही उच्चशिक्षित आहे, मात्र अश्विन अमेरिकेस गेल्यावर तिने त्याच्या नावावर खंडणी मागितली होती. अतुल पोतनीस यांच्याकडून ही खंडणी वसूल केलेली होती, हा प्रसंग दाऊदची बहीण हसीना पारकर हिच्यावर बेतलेल्या 'हसीना' या सिनेमात जसाच्या तसा घेतला होता.