Friday, November 27, 2015

शहीद साळसकर आणि अरुण गवळी - एक किस्सा ...




डॉन अरूण गवळीने एकदा महिला पत्रकारावर हात उचलला होता. जेव्हा ही माहिती विजय साळसकर यांना कळाली तेव्हा त्यांनी चार पोलिस कर्मचा-यांना सोबत घेतले व तडक धारावीहून भायखळ्यात दगडी चाळ गाठली. अरूण गवळीच्या घरात घुसून त्याला बाहेर खेचले व पोलिस गाडीत बसवून ठाण्यात आणले. पोलिस ठाण्यात गवळीला आणताच त्याची यथेच्छ धुलाई केली. त्यामुळे गवळीची गॅंग टरकली होती. त्याआधी गवळीच्या घरात घुसण्याची कोणाही पोलिस अधिका-याने हिंमत दाखवली नव्हती. त्याहीपुढे जाऊन साळसकरांनी अरुण गवळी गँगचा सफाया केला होता. त्‍यांनी गँगस्टर अमर नाईक आणि सदा पावले यांना अटक केली होती. त्‍यामुळे ते चर्चेत आले होते. पुढे १९९७ मध्ये १५ दिवसातच गवळीचे टॉपचे तीन शूटर्स गणेश शंकर भोसले, सदा पावले व विजय तांडेल यांना एनकाउंटरमध्ये मारले होते. त्यानंतर गवळीचे साम्राज्य नष्ट करताना दिलीप कुलकर्णी, नामदेव पाटील, शरद बंडेकर, बबन राघव, बंड्या आडीवडेकर यांना एनकाउंटरमध्ये मारले. दरम्‍यान, एक एनकाउंटर करताना एका १८ वर्षीय मुलाला गोळी लागून त्‍याचा मृत्‍यू झाला. त्‍यामुळे ते वादात अडकले होते. माजी पोलिस आयुक्‍त राकेश मारिया यांच्‍या ते सर्वात आवडीचे अधिकारी होते. यामुळे शहीद विजय साळसकर यांना मुंबई पोलिस दलातील सहकारी महाराज नावाने ओळखले जायचे. साळसकर आपल्या गाडीत सदैव लोडेड पिस्तूल व रायफल घेऊन फिरत असत.…

मुंबईवरील २६/११ च्या हल्ल्याच्या वेळेस आपल्या देशावर झालेल्या भ्याड हल्ला करणा-यांना धडा शिकविण्यासाठी ते पुढे गेले. मात्र, शत्रूएवढी त्यांच्याकडे आधुनिक शस्त्रे नव्हती. तरीही त्यांनी बहाद्दुरपणे दहशतवाद्यांशी दोन हात करीत मुकाबला केला. साळसकर यांच्यासह एटीएसचे प्रमुख हेमंत करकरे, एसीपी अशोक कामटे यांच्यासह १४ पोलिस अधिकारी मारले गेले होते. साळसकर मुंबई पोलिस दलात वरिष्ठ पोलिस निरीक्षक होते. साळसकर यांनी आपल्या पोलिस दलातील कारकिर्दीत ८० गुंडांना कंठस्नानी घातले होते. यातील ६१ जणांना एन्काऊंटरमध्ये ठार केले होते. २६/११ हल्ल्यापूर्वीच्या काळात बिजय साळसकर एन्टी एक्सटोर्शन सेलचे प्रमुख होते. शहीद साळसकरांना २६ जानेवरी २००९ रोजी मरणोत्तर अशोक च्रकाने सम्मानित करण्यात आले होते. या सर्व शहिदांच्या बलिदानातून काडीचीही बोध आम्ही अजून घेतलेला नाही, याची न खंत ना खेद ! ज्या दिवशी यांच्या बलिदानाची किंमत सर्वांना कळेल तोच खरा सुदिन म्हणावा लागेल…

- समीर गायकवाड.

( छायाचित्र - विजय साळसकरांनी मुंबईच्या अंडरवर्ल्डच्या टोळ्यांचा जेंव्हा खातमा केला तेंव्हा त्यांना पोलीस महासंचालकाच्या हस्ते विशेष पदकाने गौरवण्यात आले होते तेंव्हाचे हे छायाचित्र आहे.)